Home   |   Kontakt   |   Werbung   |   Team   |   Links   |   Newsletter
 
Musik nonstop
Jetzt läuft:
Jennifer Lope… | Ain't It Funn…

Armin Hartmann

Redaktion


I über mi

Ufgwagsä bini als Prättigauer im schattige Chüblisch im wunderschöne Kanton Graubündä. Zum Glück hani als Schüeler denn uf Pany (1250 m. ü. M.) ind Schuäl törfä – mä seid, Pany seg ds sunnigste Dorf vor Schwitz. I hans gnossä als Chind indä Bärgä törfä ufzwagsä. Gärä ärinnerä i mi dra zrugg: Meterhöch Schnee im Winter, midem Schlitte und em Postauto ind Schuäl und denn heiwärts göglä, statt Turnunterricht ir Hallä am Sgilift im Dorf sgifahrä mit dr Schuälklass, ä Tschuttiplatz, e Schuelhuusplatz zum Unihockeylä und im Winter äs Ischfäld womer stundälang gspielt, kneblet und ghantiärt händ, viel viel Sport und tolli Kolleginnä und Kollegä, woni hüt no Kontakt han.

Winterchind

Obwohl i im Juni (im Summer) ufd Wält cho bin (dr Jahrgang hani jez grad per Zuefall vergässä), bini doch eher es Winterchind und trotzdem hani immer gschwindhaft chalt. Winter isch aber  für mi e tolli Jahresziit – Fondue, Raclette, Schminefüür, Hockey, Schlittschüändlä, Sgifahrä, Schneeballschlachtä, Langläuflä (han sogar 5mal dr Engadiner gmacht…J) , Rötäli trinkä (ou, das isch ja gar kei Sport – usser im Bündnerland) und und und – Winter fasziniert mi.

Sportwält

Scho als chlinä Buäb het mi d Sportwält fasziniert – ob sälber Sport triebä, Sport luägä, oder über Sport läsä und diskutiärä. I han i jungä Jahr scho tonnäwiis Heft voll gschriebä mit Sportresultat oder Bricht, woni über Sportaläss für mi Zämäfassigä gschriebä han. Dr Papä isch uf jedä Fall denn au fasziniert gsi und het gseid, dases mi scho ämal indä Sport verschlah chönnti mit derä Liedeschaft zum und fürdä Sport. Da i aber sportlich z wenig Talent ka han und us miär sicher niä ä Profisportler wordä wer, hani anderi Wäg gsuecht und dank em neo1 jez so dr Wäg ind Sportwält gfundä.

neo1 – miis , diis und ds Radio für alli

Nachem Lehrerseminar (ja, das hets denn no gä) bini uf Wolhuse (LU) züglet und wohnä jez sit guet 20 Jahr mit minerä tollä Familiä döt und schaffä wiiterhin als Primar-Lehrer (i derä Ziit isch mis Bündner Dialekt leider ä biz ir Versenkig verschwundä). Drnäbet hani im 2011 d Chancä übercho bim neo1 als Hockey-Kommentator azfangä – genau denn, wo Langnau zerstämal ir Vereinsgschicht ind Playoffs cho isch – und i zmitzt dinnä. Ds Kommentierä macht miär bis hüt sehr viel Spass, isch herusfordernd und närveufriebend wie värruckt (fast wie Autofahrä) aber s isch ä tollä Job, dä Lüüt wo Radio losend z verzellä, was für spannendi Gschichtä z Hockey und vor allem d SCL Tigers grad wiedr z büütä händ. D Gschwindigkeit, d Dynamik vom Hockey isch fasziniärend, aber als Kommentator ä grossi Herusforderig. Derä Herusforderig stelli mi aber sehr sehr gärä – Hockey isch eifach grossartig!

Jez darfi aber sit däm Summer 19 bi neo1 au als Sportredaktor schaffä und mi mit allnä möglichä Sportartä und Sportgschichtä beschäftigä und diä ir Sportstory verzellä. S isch sehr interessant, so i vieli Bereich vor Sportwält chönnä z luägä und mit vielnä Sportler über ihres ufregendä Läbä z redä.

Aber au d Emotionä im Sport körä zum Schönstä wos git uf derä Wält. I freuä mi uf ganz viel wiiteri emotionali Sportgschichtä und i bin definitiv ir Sportwält acho – dr Papä het also rächt ka.

  • Das aktuelle Sportbulletin:

     

    Das aktuelle Newsbulletin: